تعليمات وقوانين روم جالكسي سامسونج

شروط روم جالكسي سامسونج (لا تقول ما دريت)

السلام عليكم ورحمة الله وبركاته

والصلاة والسلام على سيدنا محمد وعلى اله وصحبه وسلم

قوانين الروم في البداية :
تذكر قول الله تعالى : (ن وَالْقَلَمِ وَمَا يَسْطُرُونَ) وتذكر (مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ)
وتذكر أن هذا الروم لم يوضع إلا من أجلكم لتبادل المعرفة والخبرات  والطبخ والنفخ وكل امور الحياة.
وأبرئ نفسي أمام الله عن مايحدث من امور في معصية الله

 باختصار دخول رومنا هالايام مجاني يمكن تمسك لها يوم ونحط رقم سري  كيفنا عاد المهم اذا ودك تشاركنا تفضل معنا واذا ماودك فالباب يوسع خرتيت .

اخوي الزائر الكريم هذه التعليمات الخاصة فيك :

مع محاولتنا لمنع المواضيع والردود الي فيها خنبقة او مخالفه للشروط اوالغير سنعه ونظراً للعدد الهائل من الزوار الله لا يضرهم فترى ما يمدينا نشوف كل شئ .
ومن الحين نقول بالفم المليان إن أي شئ يكتب يعبر عن رأي راعيه ولا نتحمل مسؤوليته.
وبما ان هالروم رومنا حنا يالمدراء المسجلين قبلكم فحنا حرين وبكيفنا عاد نسوي اجراءات احتياطية للروم مثلا نسويه برقم سري او نحطك اول ماتدخل الروم سايلنت على شان ماتسوي دعاية بكيفنا عشان كذا اللي يبي يقعد معنا لازم يوافق على شروطنا ولايدعي علينا ويكون مسؤول عن أي شي يكتبه ولا مهوب ملزوم يقعد معنا  وهالشي راجع له وبكيفه .

1. الروم هذا اسمه جالكسي سامسونج يحق لك تكتب موضوع او استفسار او حتسي صاحي لكن يناسب الروم (مهوب تجي لرومنا والاخوان مجتهدين بالشرح وبالبرامج وتقول ياروحي يالروم الفلاني شرحهم احسن ) والباقين يعلقون عليه وبكيفهم بيعلقون بيذبون هم حرين وما فيه اي قيود الا الحكي الماصل اللي ماله سنع أو الحكي الوصخ وترى الي يسوي كذا ماهوب أزين له واي شي تكتبه لنا الحق نتصرف فيه بأي طريقة كانت  .

2. مسموح الذب بكافة انواعه وترا اللي بيزعل من الذب حنا بنستلمه ذب لأن الزعل عندنا ممنوع اما اللي يسب والسب هنا غير الذب البرئ ( السب يعني الألفاظ البذيئه ). اما حتسي الجارات وفلانة اطيب من فلانة وخاصة من يستقصد المشرفات وتسذا ترى بنتعفجه تعفجن مزبوط .

3. أي واحد بيكتب موضوع ولا استفسار باللغه العربيه الفصحى بكيفه بس لا يبلش خلق الله انهم يردون عليه بلغه عربيه فصحى , كل واحد حر يرد زي ما يبي واللي بيغثنا ويبلشنا الا تردون علي بالفصحى بنسنعه تسنيع مضبوط . ترا علمناكم لا تقولون ما درينا والا ما قرينا الشروط. بكيفكم .

4. تبون تحكون في الدين والسياسه مايخالف بس لاتقعدون تتفلسفون وتحكون في امور مالها سنع , ابعدوا عن الثوابت والطوائف والرموز و الجدل اللي ماينفع واللي يبي يحكي في هالامور ويتفلسف فيها فيه مية الف روم غيرنا يروح لهم يسولف عندهم ثم يجي يوسع صدره معنا بس يجيب لنا مناقشاتهم . لا. معصي.ما نطيع .

5. مسموح التسجيل بكل الاسماء كلها ما عدا المخله بالاداب العامه والأسماء اللي فيها اسم عوايل او قبايل يعني اعقلوا , ترا مناب ناقصين ذب يجي بعده شي في النفوس .والي يجي حاط نكه رموز ولا حروف ولا ارقام هذا يطرد باند الى يوم الدين وجعله مايرضى.6. تتعهد انك ما تعطي نكك لأحد مو بعدين تجي تقول مهوب انا اللي قايل ذا الحكي اللي انكتب .. ترا هالحركات ما تمشي علينا .

7. قد تصلك رسائل إعلانية او تحذيرية عن طريق رومنا بالخاص او العام من قبل المشرفين, نبي نترزق الله ونفع روماتنا  وان حصل إزعاج نعتذر ويتم التواصل مع الإدارة لمنعها عنكم.اما العالم الي تسوي لكم دعايات بالخاص علمونا على شان نكفيكم شرهم.

8. اذا قريت الشروط كلها ووافقت عليها ونويت تبقى معنا اختار لك اسم رايق ولايق ووش زينه بشرط مايكون احد مسجل فيه وترى اللي بيحط مدات في اسمه وجا احد واشتكاه انه مقلد اسمه بنطردك للمريخ ونخلي القديم والاسم الي تختاره انت مهوب حنا يعني لا تبلشنا.

9. قولة انك بتستعرض بايميلك ترى كلن عنده أيميل ,ولا تستعرض برقم جوال ولا أي طريقة ترقيم لو انها بملفك الشخصي,(يعني بذاك الشريط المستطيل الي تحت اسمك)، ترى ماتمشي علينا ويمكن نشوتك بدون سابق انذار ,فكرة الترقيم شلها من رويسك.

10. ايها الزائر الكريم لا يسمح لك بالدعاية يعني ممنوع منعا باتا .مهوب تجي يالاجودي مدرعم وتنسخ وتلصق دعاية رومكم وعلى بالك بتفرك وتنحاش !! ترى عندنا مشرفين محترفين يلصقون وجهك بقوقل.

11. يمنع منعا باتا رفع التكست، (رفع التكست: تعني التنقيط،، التنقيط تعني : تكتب كلمة وترسلها وتكتب كلمة وترسلها) مثال : استغفر الله تكتبها الف مرة !! ،لا ونخوك ذا ممنوع عندنا،خل كلامك كله بسطر واحد ولا تشغلنا فنشغلك .
12. لاتصير ملقوف وتتدخل في شئون الإدارة مثل قولة ليه تعطون فلان سايلنت ولا ليه تطردون فلانة!! ذا مهوب شغلك اكل واشرب وتمتع بوقتك ولا لك شغل بغيرك، هؤلاء مشرفين يحافظون على استتباب الامن بالروم.نسميهم العين الساهرة .. ولا ماعمرك سمعت بها الاسم ؟

 
13. بعدين الله يطول بعمرك يالزائر الكريم مهوب تحسب الروم انه سينما ولا صالة افراح ولا مرقص ولا بار وتشغل لنا موسيقى!! ترى ذا ممنوع عندنا ولا حنا فاضين نتحمل اثامك. وبعدين ترى لو شغلته واحنا مادرينا عنك ترى تتحمل اثام خلق الله الي سمعوه كلهم، لاتقول ياربي مادريت.

 
14. لاجيت تسأل سؤال لازم توضح سؤالك وتكتبه بسطر واحد وتوضح وش نوع جهازك اول شي ، مهوب تلوم الناس اذا سفهوك ولا ردو عليك وتقوم الدنيا وتقعدها!! ترى العالم مهيب فاضية لك ولاهيب فاضية كل شوي تسأل وش نوع جهازك!.

 
15. اذا دخلت الروم ترى يمنع عندنا كلمة هاي والكلام الفاضي ذا حق الخواجات، ولازم انك تسلم سلام السنة الكريمة،وهذا شي راجع للمشرف ان بغى يشوتك لحوش الغنم وان بغى يخليك ويمشيها لك.

 
14. لاتتردد في حالة وجود شكوى او اقتراح بإمكانك تقديم ملف علاقي وصورة ملونة مقاس اربعه في سته وترسلها على الايميل comnet@hotmail.com او تدخل روم الاونر : دوسري راقي . وتكتب له بالخاص المشكلة مزودة بالصور . والادوات المستخدمة بالجريمة.
هذي شروطنا وان جيت وقلت تراني ماشفت شي هذي مشكلتك محلات النظارات مزاحمه شوارعنا قص لك نظاره وروقنا.

ترى شروطنا هي الي مزبوطه والزين عندنا والشين حوالينا.
اخيراً
نتمنى انها ناسبتك الشروط وان عاد ماعجبتك هذي مشكلتك.
اما بالنسبة للمشرفين وما ادراك ما المشرفين:

1. تذكران الظلم حرام وشين ويدبل التسبد البشرية.وانك اذا ظلمت ان احنا بناخذ حقهم من عيونك.
2. وممنوع منعا باتا المزح بخصائص الإشراف مع المشرفين والزوار.
3. دخول الغير بإشرافك.وتتعهد انك ما تعطي نكك لأحد مو بعدين تجي تقول مهوب انا اللي قايل ذا الحكي اللي انكتب ولا مهوب انا الي بند .. ترا هالحركات ما تمشي علينا يافلتة زمانك .
4. الدخول بنفس نك احد الادمنية.
5. التدخل في شئون احد المشرفين وخاصة فك حضر او رفع سايلنت.
6. ويمنع النقاش في امور الادمنية على العام.
7. ويسمح لك برفع اسماء للاونر ترشحهم بان يكونوا اداريين بالروم ولكن تتحمل مايصدر منهم.
8. وفي حالة الشكوى ضدك ثلاث مرات ترى بنسفرك لصنعاء.
9. في حالة رفع احد الزوار لك شكوى ولا استطعت حلها يجب عليك رفعها للأونر.ومعها فنجال قهوة.

10. لاتاخذك المحسوبية على حساب الزوار، يعني ياذكي لا تقول فلان صديقي وحبيب قلبي وبطرد فلان لانه مهوب صديقي!!

 
11. انتبه ونخوك ادخل الروم واحصلك موجود ثم اشيك على النكات ثم احصل فيها رموز او ارقام او نك غير مفهوم!! او غير واضح، او صورة مخنزة وخايسة .وتخدش الذوق العام او صورة تلهط قلوب العزاب
، وانت ياحضرة ماسويت شيء!! اجل وش الفايدة منك؟أي نك تشوفه مخالف تعطيه سايلنت وبعد دقيقة تشوته باند ، ولكن لازم تحط التعليمات بالعام قدام عيونه كوده يفهم الابله ان نكه ممنوع عندنا، وترى لو دخلت ولقيت السالفة ذي قدامي وانت ماسويت شي لاتستغرب لو سحبت اشرافك دون الرجوع لك، وهذه حالها حالة وجود دعاية لروم وانت موجود ولاسويت شي.

12.كذلك يا بعد قلبي مو تشوت واحد باند لانه متكلم عليك في روم اخر وتشوته على حساب رومنا؟؟ مهوب شغلنا ترى لو تكلم عليك في روم بنقلادش!! لو صور لنا هالشيء وتاكدنا انه صحيح. ترى بنتصرف معك تصرف مافية رحمة .مثل تصرف اندرتيكر مع توني قريه .

 
وفي الاخير اختموها بالصلاة على النبي .
وأتمنى لكم المتعة والفائدة والعشى معنا القابلة.

 
تم كتابة هذه التعليمات من قبل ولي العهد لروم جالكسي سامسونج : Dr :BrDgoSh
وبالتعاون مع وزير الداخلية الاستاذ القدير : استـاذ قشطـة .
..